ខេត្តរតនគិរី ៖ ទោះបីជាបច្ចុប្បនេះ ក្នុងខេត្តរតនគិរី មានសមត្ថកិច្ច ដ៏ច្រើនស្អេកស្កះ យាមបណ្តាក់គ្នាដូចខ្យង តាមដងផ្លូវចាំចាប់បង្ក្រាប បទល្មើសព្រៃឈើក៏ដោយ ប៉ុន្តែគេតែងតែឃើញ សកម្មភាពដឹកឈើប្រណិត របស់មេឈ្មួញដុះស្លែម្នាក់ឈ្មោះ ស្រីល័ក្ខ គ្មានញញើតនិងសមត្ថកិច្ច ឬច្បាប់ទម្លាប់ អ្វីនោះឡើយ ព្រោះតែមេឈ្មួញរូបនេះ ចេះចាយលុយដើម្បីទិញទឹកចិត្ត មន្ត្រីជំនាញ និងសមត្ថកិច្ចពាក់ព័ន្ធ។
ជាក់ស្តែងកាលពី ព្រឹកព្រលឹម ថ្ងៃទី១៨ ខែមករា ឆ្នាំ២០១៥ ឈ្មួញរូបនេះ បានដឹកជញ្ជូនឈើប្រណិត ចេញពីក្រុងបានលុង ឆ្ពោះទៅប្រទេសវៀតណាម តាមច្រកអន្តរជាតិ ដោយប្រើប្រាស់រថយន្ត ម៉ាកសាំយ៉ុង ពណ៌ស ពាក់ស្លាកលេខ ភ្នំពេញ 2M-9372 ផ្ទុកឈើប្រណិតពេញរថយន្ត ពុំឃើញមានសមត្ថកិច្ចជំនាញពាក់ព័ន្ធ ធ្វើការទប់ស្កាត់ និងបង្ក្រាបឡើយ បណ្តោយអោយឈ្មួញរូបនេះ ដឹកជញ្ជូនយ៉ាងរលូន ជារៀងរាល់ថ្ងៃ ដោយផ្គើនទៅនឹងការរឹតបន្តឹង របស់រាជរដ្ឋាភិបាល។
ដោយឡែកលោក សេង យូ នាយសង្កាត់រដ្ឋបាលព្រៃឈើ ក្រុងបានលុង មិនអាចទាក់ទងបានទេដោយសារ ទូរស័ព្ទចុចពុំចូល។ បើតាមប្រភពផ្សេងទៀត បានខ្សិបប្រាប់ អ្នកយកព័ត៌មានថា ដោយសារឈ្មួញរូបនេះ ប្រមូលទិញឈើប្រណិត និងដឹកជញ្ជូនទៅលក់ នៅប្រទេសវៀតណាម បានយ៉ាងរលូនជារៀងរាល់ថ្ងៃ ដោយសារសមត្ថកិច្ច ជំនាញពាក់ព័ន្ធទាំងនោះ បានទទួលលាភសក្ការៈ ជារៀងរាល់ខែ ពីឈ្មួញខាងលើនេះ ប្រសិនបើឈ្មួញរូបណា មិនបានបង់ខែ ទើបសមត្ថកិច្ចចាប់បង្ក្រាប យកស្នាដៃ បង្អួតថ្នាក់លើ៕
